Hadimin Tambuwal, Mataimakin Shugaban PDP da Wasu Dandazon Mambobi Sun Koma APC a Sakkwato
managarciya
0
190
Hadimin gwamna Aminu Tambuwal na Sakkwato na musamman, (SA), Alhaji Garba Tozai, da mataimakin shugaban PDP a ƙaramar hukumar Isa, Garba Araga, sun sauya sheka zuwa jam'iyyar PDP.
Managarciya ta ruwaito cewa jigan-jigan biyu sun koma APC ne tare da ɗumbin magoya bayansu dake dukkan sassan jihar Sakkwato.
Wannan na kunshe ne a wata sanarwa da mai magana da yawun Sanata Aliyu Wamakko, Bashar Abubakar ya fitar ranar Asabar a birnin jiha ya ce tsohon mataimakin shugaban PDP, wanda ya yi jawabi a madadin masu sauya shekar, na cewa sun yanke wannan matakin ne duba da ƙarfin masu ruwa da tsakin APC a jihar.
"Muna da kwarin guiwar cewa bisa la'akari da cigaban da ake samu a shiyyarmu, PDP ta zama tarihi. Yau gamu a APC muna da jagora Kanal mai ritaya Garba Moyo, tsohon kwamishina a gwamnati mai ci ta PDP."
"Bugu da kari, tare da Alhaji Ibrahim Lamido a matsayin takarar Sanata a shiyyar mu babu tantama za'a share mana hawayenmu." Garba Araga.
Malam Araga ya kara da yabon Sanata Wamakko, jagoran APC a jihar Sakkwato tare da alkawarin zasu ba da haɗin kai da aiki a tare da juna don tabbatar da nasarar jam'iyyar a zaben 2023.
A wani cigaba makamancin wannan, jam'iyyar APC ta karbi dandazon masu sauya sheka daga jam'iyyar PDP a garin Gadambe dake ƙaramar hukumar Silame.
Da suke karɓan masu sauya shekar, shugaban kwamitin rikon kwarya a yankin, Alhaji Dalhatu Dantama, da wani jigon APC, Alhaji Abubakar Rana, sun tabbatar musu da ba za'a nuna musu banbanci ba.
Wani Jigon APC a Sifawa, karamar hukumar Bodinga ta jihar Sakkwato, Idris Shehu, ya tabbatar da cewa hadimin gwamnan ya yi murabus sannan ya koma APC.
A zantawarsa da wakilinmu, Shehu yace jam'iyyarsa APC ta shirya tsaf domin kwace mulki daga hannun PDP a jihar idan aka yi la'akari da faruwar irin haka kuma yace wannan somin taɓi ne. A cewarsa,
"Kashi 80 cikin 100 na mutanen Sakkwato bamu jin daɗin mulkin PDP tun farko, idan ka duba gwamna ya yi nasara da kuri'u 342 a zaben 2019, alamu sun nuna mutane ba su jin daɗi."
